Heb 4 | KYG | STEP | Inagi Goti'a ani kava'mo huguve, huno hu male'niya gemo hano osuno afa'a hane'nigeno hemeni'e'mo huno'ae'mo, nagae'e'mo maita falu huta maigae, huno laha nepaiye. Fiku yanagetapa lapakaepati'mo mago vaya'mo haitapa metalegayanagi koli higetao.

Hebrews 4

1 Inagi Goti'a ani kava'mo huguve, huno hu male'niya gemo hano osuno afa'a hane'nigeno hemeni'e'mo huno'ae'mo, nagae'e'mo maita falu huta maigae, huno laha nepaiye. Fiku yanagetapa lapakaepati'mo mago vaya'mo haitapa metalegayanagi koli higetao. 2 Goti'a alagepa faigoko ge'amo hapa pai'nige'a afi'naya kava huno laha pai'nigeta ago afi'none. Afi'naya'monanafa apakesa afi'a fatago osu'naya'mofe'mo afi'naya gemo'mo hapa o'mae'niye. 3 Lagesa afita fatago hu'nona vaya'mogitamo haita Goti'e'mo magokepi lokaeta maita falu hugune. Goti'a ma mopamo ago alo huno hano hu male'niya'mofe'mo mai'a falu hisaya kava'mo hane'niye. Hane'niya'monanafa Goti'a huno'ae'mo,

Naipamo le'nige'na nago'yamo ne'atale'na lokiya gefati'mo hu'nae'mo, nagae'e'mo mai'a falu hu'a maisaya kote'mo alagi fale'a hai e'a o'maigae,
huno hu'niye. 4 Goti mukufi'mo mago gemo'mo seveni afinafe'mo,Goti'a muki ya'amo alo huno hano huteno seveni afina'mo maino falu hu'niye, huno huteno 5 mago'e gemo huno'ae'mo,nagae'e'mo mai'a falu hu'a maisaya kote'mo alagi fale'a hai e'a o'maigae, huno hu'niye. 6 Hogote'a alagepa gemo afi'naya vaya'mogi apakesa afi'a fatago osu'naya'mofe'mo fale'a hai'a mai'a falu osu'nae. Osu'nayanage'a alu vaya'mogi fale'a hai'a mai'a falu hisaya kava'mo hane'niye. 7 Fale'a hai'a mai'a falu osu'nageno asole kafugamo ago utegeno Goti'a halate mago'e afina'mo hu male'neno'ae'mo,

Hemenimo faleta haitapa maita falu hugae, huno hu male'niye. Goti'a mani gemo Nevini avayaleti'mo, hemenimo Goti ge'amo ne'afitapae'mo lapaipamo alita lokiya vaitapa o'ateyo,
huno hu'niye. 8 Ema akeya'vilaga mago vekamo agi'amo Yosuva'a Isaleli vaya'mo apavalelino u'nige'apae'mo hai'a mai'a falu hu'naesinana Goti'a henaga'amo alu afina'mo mai'a falu hisaya afinafe'mo halate ani agufa gemo osiyesine. 9 Goti'a muki ya'amo alo huno hano huteno'ae'mo maino falu hu'niya kava huno Kalaisi'a ali'ya'amo ago alino hano hu'niyanageno Goti'e'mo magokepi lokaeno maino falu nehiye. 10 Ali'ya'amo ago alino hano hu'niya'mofe'mo Goti vaya'amo mai'a falu hisaya sapati afina'mo hano osuno afa'a hane'niye. 11 Goti ge'amo amagi'a atalete'a asagau'a ai'naya kava huta asagauta aigayanagi haita maita falu hisunafe'mo layamukiki higetao.

12 Goti ge'amo auneme'e gemo hane'neno himamu'aleti'mo ali'ya'mo ne'aliye. Ani gemo'a aluga aluga'amo ave ne'neya naipemo ago aeno agaseno ave'mo lusi kava huno ne'ne. Agaemo ge'aleti'mo apaune'apamepinagi apaipa apakesafinagi apayamufafinagi apatupi'mogi huno ne'aeno alino fako nehiye. 13 Lagaemo, ma kava hu'nove, ina kava hu'nove, huta ha paisuna vekamo aulagale'mo muki nehuna kavatimo alagi fala okino afole ne'aiye. Muki vaya'mo aulagale'mo alagi fala okisageno apakegaiye.

Yesu'a hogote vekamo mono huno nelateya ala vekatimo mai'niya gemae

14 Yesu'a Goti Mafa'ne'amo hogote ala vekatimo mono huno nelateya vekamo mai'neno'ae'mo haino koku'na'mo aeno agaseno Gotitegamo haino mai'niya'mofe'mo lagesa afita fatago nehuta aeta hakalo huta hapa nepauna gele'mo atafauta alagi huta maigetao. 15 Hogote ala vekatimo mono huno nelateya vekatimo'a himamutimo ohane'niya vaya'mogitae'mo hau huno nelate. Muki alu hosu kava alu hosu kava'mo hisunafe'mo lamalageka nehaya kava hu'a amalageka hu'naya'mofe'mo hau huno nelate. Amalageka hu'naya'monanafa hosu kava'mo alagi osu'niye. 16 Inagi atete osuta Goti'a yagaino ne'apateya sia'ale'mo fai mai'neno'ae'mo fiku laha maeno nelamiya kavategamo vigetao, kana ya'mo alisuna afina'mo hau huno nelateno fiku laha maeno lamigiya'mofe'mae.